小編有位友人最近想買樓，小編聽到當然話好啦！有自己安樂居一直係大家出嚟努力工作嘅目標，但係友人卻同我講佢問過銀行好大機會會被拒批，因為佢做緊高風險工種。
究竟咩係高風險工種？呢度指嘅高風險工種唔係指有機會對人身安全造成傷害嘅危險工作，對銀行嚟講，找換店、麻將館、賭場一直被視為「高風險行業」，如果您係嗰度工作，銀行就會認為您做緊高風險工種，因為喺環球金融監管嚴格下，大部分銀行都會將呢啲業務視為有「洗黑錢」風險。係處理申請過程中銀行需要極多時間去諮詢反洗錢部門又要調查申請者背景，所以對於呢類申請者都會有種「多一事不如少一事」嘅心態，寧願少單生意都唔想惹上麻煩，所以高風險工種嘅申請者通常好難俾銀行批到按揭。
咁小編嘅友人除左換工外咪冇可能買到樓？
咁又未必嘅！凡事皆有可能啊嘛！小編嘅友人雖然係做緊麻將館，但係佢只係從事後勤工作，相對前線人員嚟講比較容易批到，因為前線人員風險比較高，六成按揭都比較難批到，高成數按揭按揭更加係難上加難。另外小編亦叫友人係買樓前先養成良好理財習慣，盡量減少借貸，有債務在身，要注意準時還款。
買樓時盡量選擇大型屋苑或質素較佳嘅分層大廈，日久失修嘅唐樓或偏遠村屋盡量唔好揀；係申請時可以先從中小型銀行落手增加獲批機會，因為大型銀行通常都會拒絕這些申請，處理高風險職業嘅按揭申請好費時同好複雜，對銀行風險亦高，很多時都係靠前線同批核部角力幫您爭取批核成功，但您每次向銀行申請都會令環聯信貸紀錄出現「信貸查詢」標記，當銀行職員查核環聯紀錄時，見到申請人已經向多間銀行申請按揭嘅時候，會覺得自己只係「陪跑」，失去咗想幫手嘅熱情。
最緊要係證明俾銀行睇您嘅借貸風險唔高，準備好良好嘅信貸紀錄，齊哂入息證明，確保想買嘅物業質素良好，按揭獲批機會都會大大增加！係度小編都先祝友人同「高風險行業」嘅大家都搵到自己心水嘅靚盤，成功上樓！有咩事就下面留言問小編啦，無咩事都要keep住留意我哋嘅page啊！我哋下次見啦～
Comments